India vs Brazil: Ticket hralh aiin sem a tam zawk!

October 3, Inrinni zan khan India leh Brazil ten Salt Lake Stadium, Kolkata-ah friendly match an khel a, world champion vawi nga ni tawh Brazil hian 4-0 in India an hneh.

Vinicius Jr telna Brazil inkhel en turin mipui pungkhawm an tam tawk lo a, heti chung hian ticket tam zawk chu semchhuah a ni! India leh Brazil inkhel kha official-a puanzar a nih danah chuan, mi 51,000-in a hmunah an en.

Mipui 85,000 lenna Salt Lake Stadium nena chhutin inkhel en an tam lo a, Kolkata khawpuia inkhel an ni tih ngaihtuah phei chuan a tam tawk lo - heti chung hian ticket hralhchhuah zat chu 16,500 chauh a ni!

India rama football thuneitu sang ber, All India Football Federation (AIFF) chuan ticket 40,000 vel a thlawnin a sem chhuak niin an sawi a, ticket man to viau mah se, an hralh tlem em avangin ticket man aṭanga sum hmuh hi a tlem viauin a rinawm.

Brazil hian India rama inkhelh manah hian vaibelchhe 50-70 inkar an dawng nia sawi a ni a, nizana India nena inkhel tho Uruguay chuan vaibelchhe 20 bawr vel an dawng bawk.

Hetihlai hian AIFF president Kalyan Chaubey chuan, friendly match an khelhpui ramte sum hlawh chu AIFF account aṭanga pek a nih loh thu a sawi a, hei vang hian AIFF finance committee lam pawh hriattir an nih loh thu a sawi.

AIFF hian nizana India leh Uruguay inkhel atan pawh ticket man nasa takin a tihniam a, a tira Rs. 1999 man kha Rs. 199-ten an zuar! Hei chauh a ni lo - West Bengal sorkar chuan ticket 22,000 a sem a, Kolkata club lian East Bengal leh Mohun Bagan te pawhin an club member-te hnenah ticket an sem!

Hetihrual hian All India Football Federation (AIFF) chuan December 20-ah hruaitu thar thlanna an nei dawn a, hei vang hian State FA hruaitute chu November 4 hmaa inthlang fel turin an hriattir.