Zemabawk tan Rinchhana a vul

Mizoram Basketball Association buatsaih Favang tournament chu Thawhṭanni khan khelh chhunzawm niin, Zemabawk Basketball Club chuan 91-70 in Chanmari Basketball Club an hneh a, ZBBC tan Lalrinchhana a langsar hle.

Inkhel dangah Tuikual South Basketball Club chuan 85-84 in Nursery SC an hneh a, Tuikual South BC hi match thum an khelh aṭanga an vawi khat chakna chiah a ni.

Mizoram Super League club pool B inkhelah Zemabawk BC an ṭha fal a, mahse MSL 11 finalist hi first quarter-ah an khel ṭha tawk lo an vanduai ni a thleng dawn niin a lang hman.

Mahse second quarter leh third quarter-ah insiamṭhain hma an sawn hret a, fourth quarter-ah Rinchhana inlarin point 19 zet a nei a, 'three points' a vawm luh hmangin a team hma a hruai falpui.

Chanmari tan ZBBC player hlui Lalrozama leh a unaupa Lalnunpuia bakah, Lalfakmawia te khel chhe lo mah se Rinchhana an ngam lo. ZBBCtan Kulikawn rawlthar bakah hian Lalruatkima, K. Lalthianghlima, Michael Lalṭhakima leh Lalropuia te an ṭangkai lehpek hle.

Zemabawk hi match hnih an khelh tawhah chak ve vein, thilmak a thleng a nih loh chuan semifinal an lut tawhah a ngaih theih. Chutihrualin semifinal-ah club lian Zarkawt BCA leh Khatla TBL te an la hmachhawn theih avangin an inthlahdah thiang lo.

D League inkhelah Nursery SC vanduai a kaltluang laklawh a, Ramhlun SC an hneh loh hnuah Tuikual South BC an hneh loh chhunzawm. Chutihrualin MSL pawha tawnhriat nei tawh, TKS hi an dinhmun tichiang turin midang result-ah an innghat thung.

Zaninah Favang tournament hi chhunzawm a ni leh dawn a, Dawrpui Alpha leh Durtlang Mohicans te dar 6:30-ah an inhmachhawn ang a, dar 8:30-ah MSL club thar pahnih Chaltlang BC leh Dawrpui Hotshots te an intawng ve dawn thung.