England tan Harry Kane a vul

Thawhlehni zan khan England-in Nations League-ah Czech Republic an mikhual a, Wembley Stadium-a inkhelah Thomas Tuchel-a hote 3-0 in an chak. Three Lions goal thumah Harry Kane a inrawlh vek a, England captain hian goal hnih a khung.

England-in inkhel an thunun a, goal hmasa ber hi minute 27-naah Vladimir Coufal-a'n an lamah a tilut. Mual dinglam aṭangin Kane-a'n ball a vawrh lut a, England captain ball dahna lai hi a fuh avangin Coufal a chesual hi a mak hran lo.

Bayern Munich a zawm hnuah Kane-a'n hma a sawn lehzual a, Czech lakah pawh no. 9 hna thawk mah se midfielder ang maia ball a sem chang a awm tho. Kane hian a chance ṭha neih a hlah lo a, minute 40-naah Morgan Rogers-a cross ṭha bik chu goal-ah a chantir.

Second half ṭantirhah Kane-a'n cross bar a pet per nghal a, goal khung tur pawhin hun a duh rei lo. Minute 57-naah Lewis Hall-a corner kick pet chu Kane-a'n a tauh lut. England-in left back nghet an mamawh a, Newcastle United defender Hall hi a chhanna a ni thei ang.

Chutirhualin Kane erawh thlak a harsa dawn. English striker hi kum 33 mi a ni tawh a, hun tam ngah tawh loin lang mah se goal khung kawngah erawh a vanglai a hmang a ni ber. Euro 2028-ah England hmachhuan a la nih ngei a rinawm a, chutihrualin World Cup 2030-ah chuan Three Lions hian a thlakna tur emaw amah thlawptu tur striker ṭha an mamawh belh ang.

Tuchel-a hote hian match liaah point kua hmuin quarterfinal lut turin an dinhmun a ṭha tawh hle.