Wemby-a'n rugby team-ah training nei

San Antonio Spurs player Victor Wembanyama chuan French Rugby club Provence-ah training a nei a, Wemby chuan infiamna danga training a neih chuan hmasawnna kawngah a puih thu a sawi.

Kum 22 mi Wemby training neihna Provence hi French second tier club an ni a, Wemby training neih chhung hi chiang taka tarlan awm lo mah se kar khat bawr vel niin khawthlang chanchinbute chuan an ziak.

French center chuan, "Hun nuam leh hlawkthlak tak ka hmang a, an team-a tel ve ang mai niin ka inhria. Chutihrualin training a hautak hle a, mahse ka taksa hriselna leh chak zawka ka khelh theihnan min pui a, hmasawnna kawngah min pui a ni," a ti.

Provence-ah Wemby hian rugby player te training dan ang chiah a zawm ve a, 'tackle pads' te chu a hman ve vek bakah an ball in pass dan zawng zawng pawh a zir vek. Hei bakah hian English rugby player Teimana Harrison nen dressing room-a an titi dunna thlalak hmuh tur a awm bawk.

Wemby hi NBA atana inbuatsaihna a neihnaah season hmasa ṭan hma khan, China-ah kalin Shaolin puithiam bulah training a lo nei tawh a, gym-a a taksa tidanglam kher loa rilru fim tak nena khelh a zir duh vang a nih thu a lo sawi tawh.

China-ah khan Wemby hian inkhelh bakah a ei leh in thlengin a tidanglam a, puithiamte tih danin thlai chiah a ei a, zing lamah 'kung fu' zirin zan lamah basketball khalh (dribbling) chungin tlang a lawn ṭhin.

A thawhrimnain rah ṭha a chhuah a, Wemby hian a team chu season hmasa khan final a thlenpui. Chutihrualin final-ah New York Knicks an hneh lo a, 4-1 in a vanduai zawkah an ṭang.

Kuminah Wemby hian a team chu champion pui ngei a tum tawh dawn a, naktuk zinga Atlanta Hawks nen friendly match an khelh turah en bik a hlawh ang.