Spain chakna Merino goal hnih

Nations League khelh mekah World champions Spain chuan Thawhlehni zan khan goal an chhuah hnuah Mikel Merino goal hnih hmangin Croatia an lehthal a, match li an khelh tawhah chak vekin group C hmahruaitu niin quarterfinal an lut tawh bawk.

Poljud, Croatia-a inkhelah mualneitu an hlauhawm hmasa zawk a, Bayern Munich defender Josip Stanišic-a tauh chu Unai Simon-a'n ṭha zetin a dang a, Spain an him hram.

Mahse Croatia bawk an hlauhawm chhunzawm a, minute 17-naah goal an khung ta nge nge. Blazers (Croatia sawina)-in mawi taka Spain midfield an ṭhiah hnuah Igor Matanovic-a'n goal-ah a pet a, Simon-a'n dang mah se a per let chu Perisic-a'n tauh lutin a team hma a hruaipui.

Goal an chhuah hnuah pawh Spain an insiamṭha thei lo a, Mateo Kovacic-a'n chance ṭha a hlah chu an vanneihpui zawk hial. Luis de la Fuente naute first half-ah an khelh ṭhat tawk loh avangin an chak loh ni a thleng dawn niin a lang hman.

Second half-ah erawh Spain chu team thar an ni a, Lamine Yamal leh Dani Olmo hmangin Croatia tlarhnung an rum ṭhaih nghal. Goal khung turin an nghak rei lo a, minute 61-naah Merino chuan hnai tak aṭangin an siphurh sutna goal a khung.

Croatia tan Perisic bawk a langsar a, Pau Cubarsi pass sual nangchingin goal a khung teuh hle a, Simon a paltlang zo lo. Perisic a fimkhur tawk lo a, minute 79-naah Marc Cucurella chu hnung lam aṭangin a titlu a, yellow card pahnihna hmuin hnawhchhuah a ni.

Kim loa an khelh hnuah Croatia an inveng tluan teuh a, mahse Merino bawk an dang zo lo. Arsenal-a a teammate Martin Zubimendi pass chu ṭha taka a lak hnuah chiang zetin a pet goal a, an chakna goal a ni zui a ni.

La Roja hian match li aṭangin point 12 an hmu tawh a, November thlaah inelna chhunzawm a ni dawn. Hetihlai hian Croatia erawh vawi khat chiah an la chak a, point thum hmuin pathumnaah an awm a ni.