Khatla TBL-in semifinal an lut

Mizoram Basketball Association buatsaih favang tournament khelh mekah, Khatla TBL chu semifinal lut pha lo dinhmunah ding hman mah se Thawhlehni zan khan Saron Veng Basketball Club chu 85-81 a hnehin pool A pahnihnaah an awm a, semifinal an lut.

Inkhelh chhung zawngin TBL-in hma an hruai fal thei lo a, Saron-in Mizoram Super League champion an hlau bik lo. Saron-in third quarter thlengin TBL an um a, hmahruaitu zawkah an ṭan chang a awm.

Mahse fourth quarter tawp lamah Saron an inthlahdah a, TBL an chet ṭhat tluan avangin point li leka inthlauin Liansangpuia naute an chak lo a, semifinal an thleng zo lo.

TBL tan MSL 11-a Most Valuable Player (MVP) Vanlalṭhazuala a che ṭha a, Emanuel VL Awmpuia leh Laltlanhlua ten an thlawp ṭha bawk. Chutihrualin Hlutea thlawptu tur palian an neih loh avangin semifinal-ah buai phah thei ang.

D League inkhelah Ramhlun SC-in hneh loh an tawng ve ta a, Chawnpui Basketball Club chu 81-76 in an hneh lo. MSL pawh lo khel tawh Chawnpui an ṭha a, semifinal lut turin league round-a la chak vek Ramhlun an hneh thei ang.

Favang tournament hi zaninah khelh chhunzawm leh tur a ni a, dar 8:30-ah Zarkawt BCA leh MSL kai thar Ramthar Vanguard te an inhmachhawn dawn. Hemi hma hian zanin dar 6:30-ah hmeichhe inkhel a awm dawn a, Bungkawn LB Associates leh Maxim SB te an inkhel ve thung ang.