Ropui taka AFC lehthaltu Police

Tualchhung football chanchina inkhel ropui ber zinga mi chu Zirtawpni zan khan Lammualah phochhuah a ni a, Mizoram Police-in Aizawl FC laka 5-1 a an hnufual hnuin 6-5 in an lehthal.

Police lehthal Aizawl FC hi I League club an ni a, MPL hmahruai mektu an nih bakah Police an hmachhawn hma MPL match 10-ah hneh loh tawng loin vawi riat an clean sheet a, goal thum chhiah an chhuah. Lalbiaksanga Colney hote hian thil theih loa ngaih an ti thei a, Police-in an ze tak tak 'tlawm duh lohna' leh  'huaisenna' an lantir leh ta.

Aizawl FC-in I Day Football-ah Police 5-1 in an sawp a, MPL-ah 1-0 in an hneh leh bawk. I League club lakah Mizoram Police ṭum hnih an mualpho tawh a, chak loh a thiang tawh lo. Amaherawhchu vawi thum chak zawn tawh Police aiin Aizawl FC-in bul an ṭan ṭha zawk a, first half-ah Alfred Kemah Jayan leh Rochharzela ten goal hnih ve ve khungin Hmangaihkima goal khat nen goal nga an khung der tawh. Police hian Lalbiakhlua (Hlutea) hmangin goal khat khung ve mah se scoreline chu 5-1 a ni.

Aizawl FC ṭantuten 'Mizoram Police is falling down' tiin an khingpui team an au el a, Police hotu in lama inkhel en te pawhin thinrim ṭunin TV an off.  Police an tlusawp a, minute 45 an la hmabak chu mualpho belhchhahna tur chauh niin a lang. 

Mizoram Police-in second half-ah an theihna an lantir thuai a, minute 52-naah midfielder ṭha R. Malsawmtluanga chuan pui zetin freekick aṭangin a khung a, inkhel thi tawh chu a nung thar. Chutah Police coach BS-a Colney-in a thluak a vawrh a, keeper Lalṭanpuia, forward Lalnunsanga (Tale-a) leh Lalsangbera te a rawn luhtir a, goal venhim leh goal khung a ngai pawimawh tih a lang.

MPL top scorer vawi hnih ni tawh Lalbiakhlua'n (Biaktea) minute 63-naah Police goal thumna a khung a, inkhel a nung thar hle. BS-a Colney substitution siamin awmzia a nei tih a lang a, Chanmari West FC forward hlui Tale-a'n minute 66 leh 68-naah a khung a, 5-5 a ni.

Richard Kassaga hoa Aizawl FC tlarhnung inrem chu Malsawmfela leh Police-in an su chhia. Police forward Biaktea'n penalty a hlawh chhuak tawha a inngaih hnuah referee-in freekick a pe, replay-ah box chhung a nih avangin referee-in foul-a a ngai a nih chuan penalty tur a ni.

A tawpah Police-in hnehna an chang tho a, Joe Zoherliana handball vanga an penalty hmuh chu  Lalbiakthanga Hmar-in chakna goal khung nan a hmang - penalty hi bench aṭanga lut Sangbera hlawhchhuah a ni. Aizawl FC coach Standly Rosario-a'n BT-a penalty pet tibuai turin keeper Lalawmpuia aiah Lalremruata a luhtir a, awmzia a awm phah lo.

Police-in MPL history-a inlehthalna ropui ber an thlentir a, tualchhung football-a dai tawh lo tur inkhel hmuhnawm an hnutchhiah a. Inkhel ropui hian MPL8 inkhel hmabak a ti nghahhlelhawm sawt ang.