Chawnpuiin Electric Veng an hmet thim

Chawnpui FC-in coach thar Laldinthara kaihhruaina hnuaiah Mizo coach ṭha Lalsangzuala enkawl Electric Veng FC chu 2-1 in an hneh a, MPL khel zel turin beiseina thar an nei leh ta bawk.

I Day Football champion Electric Vengin semifinal khel turin point thum an mamawh a, amaherawhchu Chawnpui tum dang an nei. Thara hote hi an khel ṭha a, midfielder ball thiam C. Lalremruata'n penalty hlah mah se Vanlalthlamuana goal hnih hmangin hnehna an chang.

Minute 15-naah Thlamuana'n a u Lalnunmawia hnen aṭanga a ball hmuh chu goal-ah a pet a, keeper MS Dawngliana'n a tihtur a ti lo. Minute 84-naa goal-ah erawh Electric Veng keeper dem theih a ni tawh lo a, Ramhlun South tlangval Thlamuana'n D. Lalsangpuia hnen aṭanga a ball hmuh chu keeper bum nan a hmang.

Injury time-ah Chawnpui defender Jonathan Lalhriatkima handball vangin penalty a chawi a, keeper Vannunmawia'n  Electric Veng FC forward David Lalchhuanawma penalty pet dang mah se Salem Veng tlangval hian a per nang fuh hmasain siphurh a sut ṭhen a, result erawh a danglam phah lo.

Chawnpui coach Laldinthara chuan, "Player-ten thusawi an ngaithla uluk a, sawi anga khelh an tum a, chak duhna rilru nen an khel a, chu chuan result ṭha min pe," tiin an game plan anga an khelh thu Vanglaini a hrilh. Chawnpui hian point sarih an hmu a, an chung chiaha awm Ramhlun North point khat chauhin an pha tawh lo.