Stamford Bridge-ah Man Utd lenglut dawn

Manchester United chu zanin dar 1:30 hian Chelsea hmachhawn turin Stamford Bridge-ah an lenglut dawn. Premier Leagueṭan niah Ole Gunnar Solskjaer-a hoten nikum August 11 khan Frank Lampard-a hote 4-0 in an sawp a, October 30 khan Stamford Bridge-ah United hian League Cup-ah 2-1 in hnehna an chang leh bawk.

Premier League table thlir chuan Chelsea hi point 41 hmuin palinaah an awm a, Manchester United erawh pakuana daih an ni, an inthlauhna hi point ruk a ni. Point dinhmun vangin inkhel pawimawh a ni a, United player thar Odion Ighalo leh Bruno Fernandes te vangin en châkawm a ni bawk.

United hian thlasik chawlh laiin Spain-ah training an nei a, Ighalo-a'n a zawm ve lo. United manager Solskjaer chuan, "Thawhṭanni zanah a inkhel ngei dawn e, ka ti lo. Awm hrang (Corona virus vang) tura an tih hun chhung chu a zo tawh a, kan zingah a rawn tel ve dawn a, a inlan dawn em tih erawh hunin a hril ang," tiin Ighalo chu inlan thei a nih thu a sawi.

Portuguese midfielder Bruno Fernandes erawh match hnuhnung bera Wolverhampton Wanderers nen an inhnehtawk ṭumin a khel tluan a, Chelsea nen pawh hmun pawimawh a chang ang.

Chutihrualin Spain-a zin Scott McTominay leh Axel Tuanzebe te bakah player pawimawh pahnih Paul Pogba leh Marcus Rashford te erawh Blues hmachhawn turin an la inpeih lo.

Chelsea pawhin January thlaa inhliam Christian Pulisic an la chhawr thei dawn lo a, Ruben Loftus-Cheek pawh dam hnai mah se United nen erawh beisei ngam a la ni lo ang. Kum 22 mi Tammy Abraham erawh a inlan theih a rinawm a, London club goal nawr a na sawt ang.

Blues manager Frank Lampard chuan, "Kan tan hun pawimawh a ni a, kan academy player-te an pawimawh. Academy-a awm an nih chuan first team khelh dan an hre bel tur a ni a, hun ṭha neih an hmang ṭangkai thei tur a ni. Tun season-ah player naupang zawkte an che ṭha a, hei aia ṭha hi ka la beisei a ni," tiin player naupang zawkte an pawimawh 

thu a sawi.