Flick-a hnuaiah Bayern an 'click'

Manager lailawk Hansi Flick kaihhruaina hnuaiah Bayern Munich-in an hmelma Borussia Dortmund chu Allianz Arena-ah 4-0 in an sawp. German champion tan hian Robert Lewandowski (2) leh Serge Gnabry ten an khung bakah Dortmund defender Mats Hummels-a'n an lamah a tilut.

Bayern Munich-in kawng tinrengin inkhel an thunun a, Dortmund-in awmze neiin ball an inpe ve thei meuh lo. Centre back mumal awm lohna Bavarians tlarhnung phuahchawpin harsatna an tawk lo a, tlarhma lamah Lewandowski a vul hle.

Polish striker Lewy hian minute 17-naah ṭha zetin a tauh lut a, first half-ah goal belh lo mah se Bayern ṭhat zia erawh hmuh hmaih rual a ni lo. Lewandowski-a'n ball kang lai a la ringawt pawh hmuhnawm a tling a, minute 47-naa Gnabry-a'n a khung belh hnu phei chuan chak tur a chiang tawh.

Lewandowski-a'n minute 76-naah khung belhin Bayern player hlui Hummels-a'n an mahni lamah a titut a, kawng engkimah mualneitu an chungnung. Dortmund erawh an chet fuh loh vangin manager Lucien Favre-a'n minute 36-na lekah Jadon Sancho a thlak a, awmzia a awm lo. Marco Reus luh hnuah pawh Dortmund khel a nung pha lo. Allianz Arena-ah Bayern-in DFL-Supercup-a an hneh loh Dortmund lakah phuba an la.

Bavarians CEO Karl-Heinz Rummenigge chuan, "Thu thar awm leh hma chu ngaih ṭha takin Hansi Flick-a'n a ho ang," tiin a sawi a, manager lailawk hnuaia an khelh dan chu hahipin a fak. November 23 hian Bayern-in Fortuna Duesseldorf an hmachhawn dawn a, hetah hian manager thar awm hman tura ngaih ni hman mah se Flick bawkin Bayern a enkawl a rinawm ta zawk.