Ramdina leh Remrema ten semifinal an lut
Mizoram Labour Link LPS Pro Fight 2026 zan 24-na chu Nilaini zan khan neih a ni a, Ramdinthara leh Zoremsanga te chuan unanimous decision-a chak ve vein semifinal lut. Semifinal hi zanin aṭanga chhunzawm tur a ni.
Hello Ramdina
Pangzawl boxer Ramdina'n Lalchhuanawma hmachhawnin a tir aṭangin a nawrtuah a ṭang nghal a, chiang taka hnek fuh ngah nghal lo mah se round khatna aṭangin a langsar zawk a ni.
A pumraw lian zawk ni lo mah se Ramdina'n Chhuanawma a hnaih chuilh ngam a, Pro Fight-a vawi li lo tel tawh leh 'title fight' lo hmachhawn tawh a nihna a lang . West Lungdar tlangval Chhuanawma a inveng seng lo a, Ramdina lua hnek fuh chang nei ve mah se a hnek chhuak tlem zawk.
Judge pathumin Ramdina an chaktir vek a, Pangzawl tlangvalin phu takin semifinal a lut. Ramdina hian semifinal-ah Ramthar North boxer Lalrambuatsaiha a hmachhawn dawn.
Ramdina chuan, "Damlohna ka neih avangin ka inbeisei sang lo a, kan inhnek zawhah pawh khan ka chau khawp mai. Mahse semifinal ka huphurh phah chuang lo a, champion ngei ka tu," tiin Vanglaini a hrilh.
Remrema a ṭha
Welterweight inhnek turin ngaihven a hlawh a, a chhan chu intumtawk tur taka ngaih Remrema leh Jeffrey Lalruatkima te an inlan dawn vang a ni. Boxer pahnihte an inhlau lo tawn a, round khatna aṭangin an innawr nghal.
Inhnehtawk taka round khatna an zawh hnuah Remrema ṭhatzia hmuh theihin a awm a, Jeffrey-a hnek a bum theih bakah na takin a vaw let zel thei a, a ban seina a hmang ṭangkai thiam bawk. Chutihrualin Kolasib Project Veng tlangval Jeffrey-a fitness a ṭhat avangin a tlu lo.
Round li an khelh zawh thlengin Remrema a che ṭha zawk a, Jeffrey-a'n zan dang a pha lo. Lightweight champion lai Lalkhawngaiha unaupa Remrema'n semifinal lutin, Inrinni zanah Haulawng boxer Lalnunzira nen final luh an inchuh ang.
Remrema chuan, "NTP boxing academy-ah Pro Fight atan chauh lo pawh ka inbuatsaih a, kumtluana ka lo training avangin ka inrintawk bakah ka chak ka ring lawk. Ka hmachhawn leh tur Nunzira hi kei aiin a senior zawk a, mahse huphurhna engmah ka nei lo," tiin Vanglaini a hrilh.