Lawmawma leh Ruatmawia an intawng dawn ta

Mizoram Labour Link LPS Pro Fight 2026 zan 25-na semifinal zan khatna chu zaninah neih a ni dawn a, boxer ṭha tam tak inlan tur zingah Lallawmawma leh Lalruatmawia te inhnek turin ngaihven a hlawh zual a, zanin atan 'main event' tur a ni.

A pui dawn e

Tuipui boxer Lawmawma hi Pro Fight a vawi khat telnaah kum 2024 khan welterweight-ah a champion nghal a, mahse nikum December-a Mizoram Boxing Association, MIZBA-in Mega Boxing an buatsaihah Tuipui boxer hi semifinal-ah Ruatmawia lakah a chak zo lo a, Ruatmawia a champion zui.

Kumin Pro Fight-ah Lawmawma'n a weight a tiniam a, welterweight kawnghren a kawl lai chu kalsanin lightweight-ah a insawn. Weight a sawn chhan hi Ruatmawia nena inhmachhawn leh a duh vang nia sawi a awm.

Vanglaini zawhna chhangin Lawmawma chuan Mega Boxing-ah khan a vanduai thu leh an inhmachhawn leh a nih chuan a hneh tawh tur thu a sawi. Chhiahtlang boxer Ruatmawia pawhin a huphurh loh thu a sawi a, inhnek hmuhnawm a beisei ngam.

Phuba

Kum 24 mi Lawmawma hi kuminah seeded a ni a, round of 16 aṭangin a inlan ve chauh. A inlan hmasak berah hian R Vanhne boxer Israel Lalthangliana lakah chungnung takin hnehna a chang a, quarterfinal-ah unanimous decision-in New Vervek tlangval Mickey Lalbiakzuala a hneh bawk.

NTP boxing academy-a training nei Lawmawma kutthlak a na takzet a, a kut vei lam a hman thiam avangin hmun awl pek chi a ni lo a, a ding lam a hlauhawm tel bawk.

Tuipui boxer zingah HC Johnkenty Vanhlimpuia leh Lalrinngheta te chu Pro Fight-ah weight hrang pahniha champion thei an ni a, an hnung zui turin Lawmawma'n fiahna hautak a hmachhawn dawn.

Diesel Engine

Kum 22 mi Ruatmawia hian kum 2024 khan a vawi khat nan Pro Fight a khel a, tawnhriat nei lo mah se semifinal hial a thleng a, champion zui ta Lalkhawngaiha lakah a vanduai.

A inhnek a hmuhnawm bakah a fitness a ṭhat avangin Ruatmawia hi 'Diesel Engine' tiin a hming lem an phuahsak. Kuminah seeded niin round of 16 aṭang bawkin a inlan.

Round of 16-ah Kolasib Khuangpuilam tlangval H. Zomuanpuia a hneh nghal a, quarterfinal-ah kumin inelnaa che ṭha tak Lalrohlua Pautu hmachhawn lehin a chungnung tluan zak a, Kanan Veng boxer knockout a ni lo mipui mak tih a ni.

Chhiahtlang 'Mike Tyson' tia koh bawk Ruatmawia hian Lawmawma hneh nawn a tum dawn a, welterweight champion lai hi inelna pahnihah a hneh zawn thei a nih chuan champion ta chiah lo mah se a hming a dai tawh lo ang.

Engtin zel?

Flyweight-ah Vanlalenkawltira leh Nicky Zothanpuia ten zanin inhnek an hawng dawn a, a kum zawna 'title fight' nei thei Enkawla'n en bik a hlawh leh dawn a, Tuipui boxer ṭha Nicky-a zuam erawh a chi dawn loh thung.

Hei bakah hian Pro Fight-a mikhual lo tak HC Lalramfela a inlan dawn bawk a, lightweight pawh lo champion tawh Ramfela hian Champhai Vengthar tlangval Lalremruatpuia nen final luh an inchuh ang.

Pro Fight hi LPS Arena, Falkland-ah neih niin a hmunah Rs 50 chawiin a en theih a, LPS YouTube channel-ah member tan live-in a en theih bawk. Member nih man hi Rs 179 a ni.