David Silva a inkhel leh dawn

Manchester City midfielder hlui David Silva chu inkhelh a chawlhsan aṭanga kum thum hnuah a inkhel leh dawn a, Hong Kong Premier League club Sha Tin tan a khel dawn.

Kum 40 mi David Silva hi Real Sociedad tan a khelh laiin 2023 khan training-naah a inhliam a, a hliam hi enkawl ni mah se a kum a tam ve tawh avangin a boot a khai chhunzawm.

Hemi hnu hian Silva hi a inkhel leh tawh lo a, coaching leh pundit lam a luhchilh duh loh avangin kum thum chhung chu football kaihhnawih thilah a inhnamhnawih tawh lo. Sha Tin hi October 2023 hnua football-a a inrawlh lehna hmasa ber a ni ang.

Spain international hlui chuan, "Hong Kong-a kal a an nun dan tem ve ka châk takzet. Chu ai mah chuan an rama inkhelh ka châk a ni," tiin instagram-a a video post-ah a sawi. Sha Tin hi match li an khelh tawhah pariatna an ni mek a, October 18 hian Hong Kong Football Club nen an inhmachhawn dawn.

Sha Tin chuan thuchhuah siamin, "David Silva hian squad training a rawn zawm thuai dawn a, match pangngai a khelh hmain a 100% in fit a tum phawt dawn," an ti.

Silva hian a inkhelh chhungin Man City-ah a vanglai hun a hmang a, Etihad Stadium-a kum 10 a châm chhungin nomawi 11 zet a chawi a, stadium pawnah a lim a ding hial. World Cup nomawi pawh chawi tawhtu hi, Sha Tin hian khelmual chhung leh pawnah an ṭangkaipui thei ang.