Southampton-ah Eckert a châm dawn

Club dang training lai an enthlak avanga buaina nei, Southampton chu an manager Tonda Eckert-a'n a chhuahsan dawn lo a, tun season tawp thleng Saints-ah a châm dawn tih a chiang.

Season hmasaah Saints hian Championship playoff-a an hmachhawn tur Middlesbrough an enthla tih hmuhchhuah a nih avangin hrem an ni a, an aiah an hneh tak Boro chu an tlintir. Saints hi tun season-ah pawh point li hloh sain season bul an ṭan a ngaih phah.

Football Association (FA) chuan a tirah Eckert hi football kaihhnawiha inhnamhnawih lo turin kar ruk chhung a hrem zet a, mahse tun season chhung atan a hremna hi a sut hnuhnawh. Hei vang hian Saints chuan an manager hi an chhawr tlang thei dawn a, chutihrualin pound 28,000 a chawi dawn thung.

Southampton chuan, "He thil hi kan club tihsual lian tak chungchanga hmawr bawkna a nih kan beisei. Khatiang thil kha thleng leh tawh ngai lo turin club pawh kan insiamṭha tawh.

Hun harsa kan paltlang chhung zawnga min thlawpna avangin fans chungah kan lawm a, min ṭan chhunzawm zel turin kan sawm bawk a che u," tiin thuchhuah an siam.