Zemabawk inlan leh dawn ta

Mizoram Basketball Association (MBBA) buatsaih Favang Tournament chu zaninah chhunzawm a ni dawn a, champion beiseiawm zinga mi Zemabawk Basketball Club an inlan leh dawn a, chak la nei lo Dawrpui Hotshots nen dar 8:30-ah an inhmachhawn dawn.

Inelna kal mekah Zemabawk hian match hnih khelin an chak ve ve a, point 90 score tling ve vein, Chaltlang lakah 107 zet score-in tun inelnaa match khata point ngah ber an ni mek. ZBBC hi semifinal an lut chiang tawhah a dah theih.

An match hnuhnung bera Chanmari Basketball Club nen an inkhelh ṭumin Lalrinchhana a langsar a, Kulikawl rawlthar hi zaninah pawh en bik a sual lo ang. Rinchhana bakah hian Lalropuia, Lalruatkima leh K. Lalthianghlima te an awm bawk avangin champion tur rinkai an ni.

Hetihlai hian Mizoram Super League-a club thar Dawrpui Hotshots erawh an la insiamrem thei lo a, Favang tournament-ah an la chak ve lo. Hotshots hian R. Lalnunpuia (R-a) nei mah se thlawptu ṭha an neih loh an tuar tih a lang.

Nilaini zan khan anmahni ang bawka kai MSL kai thar club, Chaltlang BC chu 64-52 in an hneh lo a, MSL an kai hnua inelna an hmachhawn hmasak bera an chet danah lawmna tur a awm rih lo.

ZBBC lakah hnehna chan an tum a nih chuan theihtawp chhuaha an ṭan a ngai tawh dawn a, match dang aiin an player ṭha bera chhal ngam R-a an thlawp ṭhat a ṭul tawh bawk ang.

Inkhel hmasa zawkah Chanmari leh Chaltlang an inhmachhawn dawn a, veng inṭhenawm an nih bakah vawi khat ve ve an chak tawh a, semifinal luh beiseina an la neih ve ve avangin inkhel hmuhnawm a beisei ngam ang.