Bengal lakah Mizoram chak lo

Syed Mushtaq Ali Trophy khelh laiah Mizoram cricket team an che fuh thei rih lo, Inrinni khan an match hnihna khelin Bengal an hneh lo. Bengal hian wicket kua in hnehna an chang a ni.

Bandra Kurla Complex, Mumbai-a inkhelah Bengal hi ṭhum vawrah vannei zawkin vawm hmasak an thlang. Mizoram tan Lalhmangaiha chuan ball 45 a hmachhawn aṭanga run 21 siamin a thawhhlawk ber a, Lalhruaizela chuan run 12 a siam ve bawk.

Mizoram hian over 20 chhungin run 79 siamin wicket li an hloh. Bengal lamin over 10 lekah wicket pakhat chauh hloh chungin target an um phak a, hnehna chang turin harsatna an tawk lo. Mizoram captain Abrar Kazi chu Karnataka Premier League an khelh laiin 'match fixing'-ah inhnamhnawih avangin hrem a ni a, tun ṭum inelnaah hian a inlan thei lo. 

Cricket Association of Mizoram (CAM) chuan Board of Control for Cricket in India (BCCI) hnenah an player thlak dilna an thlen a, an dilna pawmsak a nih avangin  Kazi-a contract an tih tawpsak. Mizoramin state pawn player an neih belh thuai ang.

Mizoram hian an match thumna atan vawiin hian Puducherry an hmachhawn leh dawn. Group D team pariat awm zingah - Mizoram, Haryana, Assam leh Meghalaya te chu hneh la nei lo an ni.