Barca chhandamtu Messi hattrick

Harsatna kara Barcelona khai chhuaktu chu Lionel Messi bawk a ni a, Argentine forward hian Inrinni zan khan hattrick siamin Celta Vigo lakah a team chu 4-1 in hnehna a chanpui. 

Catalan club tan Sergio Busquets chuan goal khat a thawh ve bawk a, Celta tana Lucas Olaza goal khungin Barca lakah awmzia a nei phak lo. Inrinni zan inkhel dangah Real Madrid chuan 4-0 in Eibar an sawp a, Barcelona nen match 12 ve ve khel tawhin point 25 an hmuh chhunzawm zel. 

Spanish club lian zingah Nizan khan Atletico Madrid an inlan a, he thu buatsaih a nih lai hian an result kan hre hman lo. 

Barcelona-in Inrinni zana league match an khelh hmaa an match hnuhnung pahnihah hnehna an chang zo lo a, coach Ernesto Valverde duh khawp lohna thu a ri ring hle. Inrinni zanah pawh Nou Camp-a inkhel tur ni mah se ṭum dang angin Barca fan-te ngaihngam takin an awm thei lo a, an rilru hahna chhawk turin Messi chuan minute 23-naah penalty hmangin goal a khung. 

Junior Firpo-a ball cross chuan penalty area-ah defender Joseph Aidoo kut a per a, Celta-in penalty chawi phahin Messi hnenah goal an 'khilai'. Mahse, minute 42-naah Olaza chuan Celta tan freekick aṭangin ṭha zetin a rawn khung a, tun hnai an result ngaihtuah tel chungin Barca fans thin phu a rang. 

First half hun pek belh a ni a, Barca-in freekick an hlawhchhuak. Catalan club ṭantute hlauhthawnna zawng zawng hnawt kiang turin Messi a lo pen chhuak a, freekick ṭha bik a rawn khung. 

Second half ṭantir a ni a, minute thumnaah Messi bawk kan hmu. Argentine forward hian La Liga-a freekick vawi 34-a khungna ni turin a pet lut a, a hattrick siamna a ni tel nghal. Hun tawp nan minute nga chauh a awm tawh tihah Sergio Busquets chuan goal dang a rawn khung ve leh a, he goal a luh meuh hi chuan coach thar Oscar Garcia hnuaia an match hmasa ber khel Celta an tlawm dawn tih a chiang tawh. 

Barca coach Ernesto Valverde chuan, "Leo nen chuan engkim tih theih a ni. Freekick pet thiam bik chungchuang a ni a, hei vang hian kan khingpuite hi an penalty area hnaihah chuan an hlauthawng ṭhin hle a ni," a ti. 

Benzema bawk 

Real Madrid tan Karim Benzema-a'n hruaitu mawhphurhna a lak chhunzawm zel a, Eibar lakah goal hnih khungin player naupang zawk tan entawn tur a hnutchhiah. 

French striker hian minute 17-naah goal hmahruai a khung a, Sergio Ramos chuan minute thum hnu lawkah penalty hmangin a chhunzawm ve leh zui. Minute 29-naah Real-in penalty an hmu nawn a, Ramos-a'n pet tawh loin Benzema chuan an goal thumna ni turin a khung. Federico Valverde-a'n a khung ve meuh chuan 4-0 a ni fel der a, an chak chiang hle. 

La Liga bikah Benzema hian Real tan goal 157-a khungna a ni a, Madrid tana La Liga-a goal khung hnem lamah pangana a ni. Benzema hian Ferenc Puskás (156) a khum a, mahse Benzema hian heti zat goal khung tura match 323 a mamawh laiin Hungarian legend mamawh zat erawh match 180 lek a ni thung.