Rafael Nadal a inringtawk

Mipa tennis thiam zual pariat inelna ATP Finals chu nizan aṭang khan khelh ṭan a ni a, zanin dar 1:30 hian Rafael Nadal leh Alexander Zverev te chuan an match hmasa ber an khel dawn.

Paris Masters-ah hliam vangin Nadal a inhnukdawk a, world number 1 hi London khawpuiah a inlan thei dawn em tih a chiang lo. Mahse, Spanish tlangval chuan, "He hmunah hian inkhelh theih loh inring ni ila chuan ka rawn kal lo ang.

"Inkhel tura ka inpeih avangin O2 Arena ka rawn pan, player ṭha dangte nen inelna hautak hmachhawn tur hian ka inpeih tawk a, hlawhtling tur erawh chuan 100%-a ṭhain khelh a ngai thung dawn a ni," a ti. ATP Finals-ah hian player pariat an inlan dawn. Andre Agassi Group-ah hian - Nadal, Daniil Medvedev, Stefanos Tsitsipas leh Alexander Zverev te an awm. Bjorn Borg Group lamah Novak Djokovic, Roger Federer, Dominic Thiem leh Matteo Berrettini te an awm thung.

Group pakhata player pali awm zel hi an inkhel kual dawn a, a tawpah a sang pahnihin semifinal an lut ang. Season hmasa khan Zverev chuan Djokovic hnehin nomawi a chawi, player pahnih hi group hranah ve ve an awm.