Badminton-ah Mizo hming a mawi leh ta

Mizoramin badminton khawvel a luhchilh mek zel - Yonex-Sunrise All India Sub Junior (U-15 & 17) Ranking Badminton Tournament 2026-ah Mizo player-ten medal an hlawh chhuak - Liansangpuia chuan Kimkim Khongsai nen ṭangdunin, Under-15 Mixed Doubles category-ah gold medal a hlawh chhuak.

Hetihlai hian Zoramthari chuan a partner, Mohita Polivaram I. nen Under-17 Girl's Doubles category-ah silver medal a la bawk a, Jaipur, Rajasthan-a neih inelnaah Mizo hming an timawi.

October 1-9 inkara neih inelnaah hian Liansangpuia leh Kimim te hian seeded no. 5 ni chungin inelna an hmachhawn a, round hmasa berah Yuvan Krishna Ravella leh Jeevikah Sai Rajesh Kumar te ṭangdun chu 15-10, 15-7 in an hneh.

Round of 16-ah Vayam Lamba leh Luckshita Bhardwaj-te inkawp chu 15-13, 15-9 in an hneh a, quarterfinal-ah

Abdullah S. leh Senilla C. te chu 15-9, 12-15, 15-9 in an paltlang hram - semifinal-ah Vishal Uthappa B.B leh Hansika Rakesh te chu 15-12, 19-17 in an hneh leh a, final an lut.

Lawngtlai rawlthar Liansangpuia leh Kimkim te hian final hmuhnawm takah Ng. Yaiphaba Singha leh Sonali Singha K. te inkawp chu deciding game-ah 13-15, 15-13, 15-13 in an hneh a, a vawi hnih nan National Ranking Tournament (U-15 XD Category) ah an champion.

Champhai Vengthlang tleirawl Thartei'n a ṭanpui Mohita nen seeded no 3 ni chungin inelna an hmachhawn a, match hmasa berah Pranambhikhaa Kannan leh Srinithi Mahesh-te chu 15-10, 13-15, 15-6 in an hneh phawt.

Round of 16-ah Harinee Senthilkumar leh Samera Suresh Kalaivani-te inkawp chu 15-11, 15-6 in an paltlang a, quarterfinal-ah pawh awlsam takin, 15-10, 15-8 in Avani Kulkarni leh Bhoomi Kulkarni-te lakah an chak.

Semifinal-ah Anushree GS leh Jashila Nadiginti Ankaiah-te inkawp tumin, deciding game-ah 15-8, 12-15, 15-9 in an hneh leh bawk - Zoramthari tan final a luh vawi khatna a ni.

Mahse, final-ah erawh, a tir lamah a che fuh zawk ni mah se, a tawp lamah chesualin, 16-14, 14-16, 11-15 in, Sharayu Ranjane leh Soraya Shelar-te inkawp lakah an vanduai a, silver medal-ah lungawi an zir.

Thartei hi Tata Trusts, NEIDA, PGBA, MSSC leh MBA thawhhona hnuaia badminton zir niin, tunah PGBA-ah Tata Trusts lam sponsor-in badminton a zir mek a a, Liansangpuia hi Regional Competitive Training Centre, Zuangtuia lo train tawh ṭhin niin, Pullela Gopichand-a kaihhruaina hnuaiah training a nei mek.

Mizoram Badminton Association chuan thuchhuah siamin, Liansangpuia leh Zoramthari an lawmpui thu an sawi a, an kal lehzelna turah duhsakna an hlan a ni.