India senior team tan Cindy inlan

Ningani zan khan Kishore Bharati Krirangan-ah India hmeichhe football team leh Russia ten friendly match an khel a, Armed Veng nula Cindy Remruatpuii Colney-i'n a vawi khat nan India senior team tan a inlan. Cindy hi Salem Veng nula Grace Lalrampari Hauhnar hnua India hmeichhe senior team-a inlan thei hmasa ber a ni.

Kolkata-a inkhelah Russia hian Kira Petukhova goal hnih bakah Iana Sheina leh Iana Svistunova te goal hmangin India hi 4-0 in an hneh. Cindy hi bench-ah a awm a, minute 66-naah Malavika a thlak.

Cindy hian India tan U17, U19 leh U20 a khel vek a, tun ṭum hi head coach coach Crispin Chettri-i'n player naupang zawk enchhin nan a hmang. Cindy bakah Babysana Devi Thingbaijam, Malati Munda, Shubhangi Singh, Dhurga Perumal leh Sibani Devi Nongmeikapam ten ram tan a vawi khat nan an inlan.

Mizoram coach lar Lalbiaksanga Colney fanu Cindy chuan, "India senior team-a khelh hi ka hlau ṭhin a, mah se han khelh takah chuan ka hlawkpui khawp mai. Club aiin training a ṭha zawk a, tawnhriat nei ṭha zawkte aṭangin thil tam tak ka inzir bawk," tiin Vanglaini a hrilh.

Cindy chuan sawi chhunzawmin, "India senior tana khelh hi chu ṭawngṭainaah pawh ka dil ngam loh a ni a, ka lawm takzet. Chutihrualin ka khelhna no. 6 (defensive midfield) hi kan captain khelhna a nih avangin starting eleven chan erawh a har dawn," tiin a sawi. October 11, Pathianni hian India leh Russia te hi an khel leh ang.