Ramthar Veng nge him dawn Kanan?

Star Cement MPL13-ah Kanan FC-in harhtharhna an chang a, table mawngphahah zung kaih nghet hman mah se round 11 a zawh meuh chuan paruknaah an awm. Vawiin tlai dar 3:00 hian KFC hian table mawngphaha awm Ramthar Veng an hmachhawn dawn a, hnehna an chang thei a nih chuan MPL khel zel turin an himah a ngaih theih ang.

Round 7-ah khan team pahnih hi an inhmachhawn tawh a, an inkhelh hmain Kanan hian point khat chiah an la hmu a, Ramthar Vengin point ruk an hmu tawh. Team pahnih hi 1-1 in an inhnehtawk a, point khat ve ve hmuh belh mah se an inkarah point nga a awm chhunzawm zel.

Mahse, Kanan FC-in match hnuhnung paliah point kua an hmuh belh laiin Ramthar Veng erawh an chak lo vek. MPL kai thar Ramthar Veng hian point sarih an hmu a, an elpui Kanan laka hnehna an chang thei lo a nih chuan an hmabak a thim khawp ang. Kanan erawhin hnehna an chang a nih chuan MPL ṭantirh lama an beisei loh semifinal hial an beisei thei dawn.