Logan Paul lakah KSI chungnung

Khawvel youtuber hriat hlawh KSI leh Logan Paul-te chu nimin khan Staples Center, Los Angeles khawpuiah an inhnek a, split decision (55-56, 57-54, 56-55) hmangin KSI hi chak zawkah puan a ni. 

Kum 24 mi Paul hian KSI-a kawng hnuai lamah a hnek avangin point hnih paihsak a ni a, youtuber pahnih inhnek hian £700,000 vel ve ve chu an hlawh chiang. Hei bakah hian ticket hralhna, pay-per-view aṭang leh inhnek pe chhuaktu DAZN subscription aṭangin sum an hmuh belh leh dawn a, an sum hmuh hi maktaduai tel fe a ni ang. 

KSI leh Logan inhnek hmaa inhnek langsar zingah Billy Joe Saunders chuan WBO world super-middleweight title a kawl lai humhim turin Marcelo Esteban Coceres chu technical knockout hmangin a hneh. Devin Haney chuan vawi 24 inhnek a hmachhawna a vawi 24 chakna ni turin Alfredo Santiago a hneh bawk a, unanimous decision (120-107, 120-107, 120-107) a hnehna changin WBC lightweight title a kawl lai chu a humhim.