Dinthar dinhmun tichhe theitu MLS FC

Star Cement MPL13-ah MLS FC-in Dinthar FC 2-1 in an hneh tawh a, zanin dar 7:00 hian RG Stadium-ah an inkhel leh dawn. Lawngtlai club hi an chak nawn a nih chuan MPL semifinal khelh inchuh boruak a sang sawt ang .

Season liam ta khan Chanmari FC leh Aizawl FC bakah Dinthar FC leh MLS FC ten semifinal an khel a, kuminah CFC leh AFC ten semifinal lut tawhin Police-in semifinal an hnaih tawh. Nizan inkhela Police-in AFC an hneh a nih phei chuan semifinal lut turin an tling tawh dawn.

Hmunruak pakhat hi Dinthar FC, MLS FC leh Kanan FC ten an inchuh dawn a, season tawp lam boruak a sang dawn. Chutihrualin MPL champion hmasa ber Dinthar hi palinaah an awm mek avangin an dinhmun ṭha ber a, an elpui Lawngtlai club lakah an chak thei lo a nih pawhin chak loh erawh a thiang lo ang.

Team pahnih an intawn hmasak ṭum hian Dinthar tan K. Lalhminghluta'n goal khung hmasa mah se MLS lamin Laldinsanga leh Falton N. Beirachakhei te hmangin an lehthal. Lawngtlai club leh Maimawms te hi an squad a inbuk tawk a, pressure sang ngam a pawimawh dawn.