Real Madrid buaina a la kiang lo?

Spanish club lian Real Madrid manager Jose Mourinho chu Kylian Mbappe lakah a lungawi lo a, team boruak ṭha loin a la kiansan lo niin khawthlang chanchinbute chuan an ziak.

Kum 27 mi Mbappe hi Nations League-a Turkey nen an inhmachhawn ṭumin chakna goal a khungna lamah a khup vei lam a tina a, a hliam hi serious lutuk lo mah se October 25, Pathianni zana El Clasico an khelh huna inlan a duh avangin France team aṭangin a inhnukdawk.

Mahse Mbappe hian a hliam hi ṭha taka a enkawl chhunzawm loh bakah club training a zawm nghal lo a, cycle a khalh lai instagram-ah a post avangin Mourinho a lawm lo hle. Spanish chanchinbu Marca chuan Mbappe-a'n a rilru a pe tawk lo a, a hliam a enkawl danah Mourinho a lawm lo hle niin an tarlang.

Kumin May khan Real midfielder pahnih Federico Valverde leh Aurelien Tchouameni te chu an insual a, hemi hnu hian dressing room boruak a chhe zual. Real hian nomawi chawi loin season an khar a, Alvaro Arbeloa-a'n a chhuahsan zui.

Indinthar leh tumin an pu hlui Mourinho an la lut a, season bul ṭan chhe lo mah se, match sarih an khelh tawhah vawi hnih an tlawm tawh a, table-ah palina an ni mek.

Portuguese manager chuan, "Dressing room boruak hi thla nga liam ta ang mai kha a la ni," a ti a, Barcelona nen an inkhelh hmain Champions League match hnih khelh tur an neih avangin Mourinho hna a hautak dawn hle.

Los Blancos hian zaninah dar 12:30-ah Villarreal nen an inhmachhawn dawn a, Mbappe a inkhel leh thei dawn nia sawi a awm. Tlarhnung lamah hliam vangin Eder Militao, Ferland Mendy leh Raul Asencio te chu khel lo tur chiang sa an ni a, hrem vangin Dean Huijsen a inlan dawn lo bawk.

Chutihrualin veteran defender Antonio Rudiger a awm a, French centre back Ibrahima Konate a dam ṭhat leh tawh avangin buai lutuk tur erawh an ni lo thung.