Musiala lo kir thuai ka beisei - Kompany

German champion Bayern Munich coach Vincent Kompany chuan an midfielder, Jamal Musiala chu a hliam enkawl dam vat a, team-a kir leh vat turin a beisei thu a sawi.

Kum 23 mi Musiala hi Nations League-a ram tan a fehchhuahnaa Netherlands nen an inhmachhawn dawna warm up-ah a malpui a tina a, a chawlh chen tur sawi chian ni lo mah se kar thum aṭanga kar li tal a nih a rinawm.

Kum 40 mi Kompany chuan, "Musiala dinhmun hi ka hriatthiampui a, hetiang harsatna kan tawh hnua kan thawh chhuah leh chiah hian chakna leh inrintawkna kan ngah sawt ṭhin. Chuvangin ani pawh ṭha taka a lo let leh ka beisei a, dam taka kan bula a lo kir leh thuai theihnan duhsakna ka hlan a ni," a ti.

Musiala hi tun season ṭan dawnah a vanduai a, August thlaa RB Leipzig leh Hoffenheim nen an inkhelh ṭumin a tlu a, thluak lamah harsatna a nei tih hmuhchhuah niin enkawl nghal a ni.

Beisei aia hmain Musiala a lo kir a, Bundesliga-ah match thum khelin goal khat leh assist pakhat a nei tawh. Mahse a inhliam leh tak avangin a tel loa Bayern an khelh leh a ngai dawn.

German midfielder awm loh chhungin Frankfurt aṭanga an lak Nathaniel Brown-a'n a hmun ruak a hnawh khat ṭhin a, Brown hi left back ni mah se attacking midfielder-ah a hmuhnawm hle.

Chutihrualin Michael Olise, Serge Gnabry leh Ismael Saibari te an awm a, Musiala awm lo mah se Kompany tan hlauhthawnna tur a awm lo. Bayern hian zanin dar 7:00-ah Augsburg an lenchilh dawn a, nizana Borussia Dortmund result a zirin hmahruaitu an ni thei ang.