McTominay-a'n training a zawm

Scottish midfielder Scott McTominay chuan training a zawm leh tawh a, a lung an zai hnua a training lehna hmasa ber a ni. Napoli chuan an midfielder hi inkhel turin a inpeih leh tawh niin an tarlang.

Kum 29 mi McTominay hian tun season match hnih an khelh tawhah bul a la ṭan ve ve a, August 30, Pathianni zana Como an hneh loh ṭum khan minute 56-naah an la chhuak a, harsatna a nei lo.

Mahse Como lakah an inkhelh zawhah a lungphu a pangngai lo deuh (mild benign arrhythmia) tih an hmu chhuak a, an zai dawn tih puangin a lo kir leh hun tur pawh sawi chian a ni lo.

Manchester United midfielder hlui hi zai nghal niin hlawhtling takin zai zawh a ni. Napoli pawhin thuchhuah siamin kar hnih a chawlh hnuah training a zawm leh tur thu an sawi.

McTominay hian a chawlh chhungin Napoli tan match thum leh Scotland tan match li a hmaih a, Scotland coach thar Sebastien Pocognoli hnuaia Nations League an khelhah a tel ve lo.

Napoli chuan, "Nilaini khan endikna kan neih hnuah McTominay hi inkhel turin a inpeih tawh a, a ṭhiante bulah training pawh a nei leh tawh," tiin thuchhuah an siam. Zanin dar 12:15-ah Napoli hian Frosinone an mikhual dawn a, McTominay a khel a nih pawhin minute 90 a inlan a rinawm loh.