Dembele leh Mendes inkhel dawn lo

Paris Saint-Germain chuan zanin dar 12:15-ah Le Mans an mikhual dawn a, he inkhelah hian Ousmane Dembele leh Nuno Mendes te an tel dawn lo tih club chuan an tarlang.

French forward Dembele leh Portuguese defender Mendes te inlan loh chhan hi an inhliam vang a ni lo a, international break-ah ram tan an khelh hah vang leh an hmabak match tur an thlir zawk avangin chawlh an pe.

PSG hian Le Mans hnuah hian October 14, Nilaini zan dar 12:30-ah Champions League khelin Manchester City an lenchilh dawn a, October 20, Thawhlehni zanah Barcelona an mikhual dawn bawk.

An hmabak match hautak pahnih a awm avangin an player pawimawh pahnih hriselna leh hahdamna an ngai pawimawh a, Le Mans nen an inkhelh zawhah training an zawm ve chauh ang.

Tun season-ah PSG an che fuh tawk lo a, League match nga an khelh tawhah vawi hnih chiah an la chak a, paruknaah awm mekin league nomawi kawltu leh UCL champion lai an ni tih a hriat.

Season hmasaa an hmachhuan ber an tlarhmaten beisei an pha lo a, Ballon d'Or kawl mektu Dembele-a'n goal a la khung ve lo a, an player thar Ferran Torres-a'n an mualpho tur a chhan zing hle.

Zaninah pawh Luis Enrique naute hi rinhlelhna nena thlir an ni leh dawn a, hnehna an chang zo lo leh a nih ngat chuan Spanish coach dinhmun a nghing tawh ang.