Foxes bu zawlah Arsenal an tlawm

Arsenal buaina chu chinfel a la ni lo, khelmual chhungah a punlun chho mek zel. Unai Emery naute hi Leicester City mualah 2-0 in an tlawm a, striker Jamie Vardy leh James Maddison ten goal an khung.

Inrinni zan Premier League inkhel dangah Chelsea chuan an mikhual Crystal Palace 2-0 thoin an hneh bawk. Foxes leh Blues hian point 26 hmuin Manchester City chungah an awm rih - nizan khan City an inlan a, an result a zirin an dinhmun a la danglam thei. Liverpool an chak a nih chuan team pahnih hi an dinhmun ngaiah an awm dawn.

King Power Stadium-a inkhelah ruah a sur avangin team pahnih an duh angin an che thei lo a, chawlhlawk hmain goal a lut lo. Second half tir lamah Wilfred Ndidi chuan bar tih perin Arsenal a rum ṭhaih.

Brendan Rodgers-a naute an hmuhnawm zawk a, Harvey Barnes leh Youri Tieleman ten mawi zeta Arsenal tlarhnung an ṭhiah hnuah box chhunga ven loha awm Vardy chuan minute 68-naah goal khatna a khung. England international hlui Vardy-a'n Gunners a hmachhawn hnuhnung vawi kuaah goal kua a khung a, a duh tawk mai lo - minute 75-naah box chhunga a ball chan chu James Maddison tan a siamsak. Maddison hian laklawh nei miah loin box pawn aṭangin a pet lut.

Brendan Rodgers chuan Arsenal an hneh hnuah pahnihna dinhmun luah mah se an tan Premier League nomawi sawi hun a la nih loh thu a sawi. Foxes hian Liverpool an hneh loh hnuah a zawnin league match vawi liah hnehna an chang tawh.

Leicester manager Rodgers chuan, "A nihna tak sawi chuan nomawi inchuha inum hi kan ngaihtuah lo. Keini chuan hmasawn zel leh team ṭha zawk din kan duh a, ka hunlai hian European football kan thleng phak a nih chuan a ropui khawp ang," tiin a ṭawng uang duh lo.

Kum 2015-16 season champion hi nomawi chawi tura rinkai zingah an tel lo a ni mai thei, mahse pangana Sheffield United aiin point kua ngawta an san fal tawh avangin season thara Champions League khel tura rinkai zingah chuan an tel tawh.

Nikum May thla khan Arsene Wenger thlak turin Unai Emery-a'n Emirates Stadium a luah a, Arsenal chief executive Ivan Gazidis chuan, "Arsenal khelh phung anga football hmuhnawm leh ṭha chhawp chhuak thei," tiin an manager hi a fak.

Spanish manager hian a hun hmasa lamah fak a hlawh chho viau, mahse season hmasa khan a hmawr a bawk fuh lo. Kuminah beisei an phak lo chhunzawm, October 6-a Bournemouth an hneh hnuah league match bikah chuan chak ni hmel an la hmu leh rih lo.

Arsenal fans zingah an manager chhuak tura duh an tam tawh a, season hnihna a hman mekah khelh dan phung nghet a la nei lo. Tlarhnung a rem phui thei lo a, midfielder talent nei ṭha pangngai tak tak pawh a chhawr thiam tawk lo - UCL khel phak china awm tur chuan insiamṭhat an ngai nasa hle.