Chelsea-in goal an surtir

International break hnua an match hmasa berah Chelsea-in an insiamṭha tih an pholang a, an mikhual Bournemouth chu 5-1 in an sawp - London club an phur thar leh ta.

Blues tan Jordan Henderson leh Joao Pedro ten goal hnih ve ve an khung a, Morgan Rogers-a'n goal khat a khung bawk - Cherries tana Evanilson-a goal khungin awmzia a nei phak lo.

Chelsea-in tun season-a league match ruk an khelh aṭangin vawi thum hnehna an channa chiah a ni a, Brentford laka 3-0 ngawta mualpho hlim an nih avangin an hnehna chan hi a hlu lehzual ang.

Hendo a tar lo

Chelsea-in kum upa tawh tak Jordan Henderson leh Danny Welbeck an lakluh khan football fans tam takin London club an nuih a, mahse, Xabi Alonso erawh a duhah a chiang - tawnhriat neih loh avanga talbuai ṭhin Blues player-ten hotu an mamawh.

Brentford lakah an tlawm a, an mualpho. Blues-in tawnhriat nei ṭha player an mamawh lai takin Hendo a lo lang a, Liverpool-a kan hmuh ṭhin Hendo vanglai kha min temtir.

English midfielder hian minute hnihna lekah Cole Palmer-a siamsak chu tawih zetin goal-ah a chantir a, goal mawi bik a ni - minute khat pawh a liam hmain Hendo hian Rogers-a goal khung tur a siamsak zui.

A la tawk lo

Chelsea-in first half-ah 2-0 in hma an hruai a, an duhtawk mai lo. Minute 46-naah Pedro inlar ve lehin, Brazilian striker hian Pedro Neto siamsak ṭha zet chu goal-ah a chantir a, 3-0 a ni.

Minute 51-naah Cherries-in beiseina an nei ve leh - corner aṭanga ball kal, Moises Caicedo-a petchhuah tum chu Evanilson chuan lo dang perin, goal-ah a lut a, 3-1 a ni.

Mahse, Cherries tan Chelsea laka comeback meuh chu a harsa. Minute 67-naah Pep Chavarría siamsak chu Pedro-a'n goal-ah a chantir leh a, international break laia khup hliam vanga Brazil squad aṭanga inhnukdawk striker hi a dam ṭha e!

A tawpah Hendo

Minute hnihna lekah Hendo-a'n goal hmahruai a khung a, a hmawr bawktu pawh English midfielder tho hi a ni. Kum 36 mi midfielder hian freekick aṭangin mawi lutukin an goal ngana a khung.

Hetihrual hian Emiliano Martinez lam hmaih theih a ni lo. Chelsea-in goalkeeper class lakluh pawimawhzia an hriat belh a, Argentine keeper hian Ryan Christie leh António Silva te khung tur nia lang chu a dansak ve ve.

Blues hian Bournemouth an hmachhawn hmain league match thum zet chu a zawnin hnehna an chang zo tawh lo a, Arsenal (2-1) laka an tlawm hnuin Hull City (2-2) leh Brentford (3-0) lakah an chak zo lo a, tunah erawh Blues 'tak tak' kan hmu leh ta a, Xabi Alonso a thaw huai ang!