ISL ṭan a ni ta; Bengaluru an chak

India rama club football inelna sang ber, Indian Super League pawh khelh ṭan a ni ta a, match hmasa berah Bengaluru chuan 3-2 in Sporting Club Delhi an hneh.

Bengaluru tan Borja Martínez chuan goal hnih a khung - Spanish forward hian minute 22-naah goal hmahruai a khung a, mahse, SC Delhi tan Rodriguinho chuan minute 26-naah si phurh a sut lehnghal.

Brazilian club lar Chapecoense striker hlui Rodriguinho goal khung hi Mizo midfielder Lalrinliana Hnamte siamsak a ni a, Terina'n a club tharah insiamrem turin hun a mamawh lo.

Minute 32-naah Delhi club hian Menno Koch-a own goal hmangin hma an hruai zui a, 2-1 a ni. Mahse, Bangalore club-in mahni muala tlawm an duh lo - Borja Martínez-a'n si phurh sutna goal khungin, minute 89-naah Menno Koch chuan chakna goal a khung zui.

Bengaluru tan Lalremtluanga Fanai chuan inkhel bul ṭanin, Bawngkawn tlangval tan ISL-a match 50 a khelh tlinna chiah a ni - Tluangtea hian a professional career-ah Bengaluru tan chiah a la khel.