Goa leh Chennaiyin inhnehtawk

Inrinni zan Indian Super League inkhelah FC Goa chuan Chennaiyin an mikhual a, team pahnih hi 1-1 in an inhnehtawk a, point khatah lungawi an zir.

South Indian club tan Irfan Yadwad chuan minute 63-naah goal hmahruai a khung a, C. Lalhriatpuia siamsak a ni - an chakpui tawh mai dawn emaw an tih laiin, minute 75-naah Spanish forward Chiki chuan si phurh sutna goal a khung a, 1-1 in a tawp.

FC Goa tan Isak Vanlalruatfela chu bench aṭangin a lut a, Chennaiyin lamah player thar Ayush Chhetri-a'n inkhel bul ṭanin, C. Hriata leh PC Laldinpuia te bench aṭangin an lut thung.

ISL hi zaninah khelh chhunzawm tur niin, zan dar 7:30-ah NorthEast United chuan Mohun Bagan an mikhual dawn. Highlander hian Mizo striker ṭha Lalrinzuala an kawl a, Bagan-ah India ang pawha top player ni phak Lalengmawia Ralte (Apuia) leh Lallianzuala Chhangte an awm thung.

Lunglei tlangval LZa hian Mumbai City chhuahsanin Bagan hi a pan a, Kolkata club hi IFA Shield a lakpui der tawh - hlawhtlinna ropui zawk chan chhunzawm zel a beisei ang.