Palmer-a'n contract thar a ziak

Chelsea midfielder Cole Palmer chuan Stamford Bridge-a cham chhunzawm zel turin contract thar a ziak a, kum 2034 thleng London club tana khel chhunawm turin rinawmna thu a tiam.

Kum 24 mi Palmer hian London club-ah hian kum 2033 thleng khel turin contract a nei sa a, kum khat danga a pawhsei bakah a hlawh tihpun a ni tel bawk - kar khatah £130,000 a hlawh mek nia sawi a ni a, a punna zat hi tarlan a awm lo.

Palmer chuan, "Chelsea hi ka tan chuan a hlu em em a, kawng dik kan zawh mek zelin ka hria. Contract thar ka ziak thei hi ka hlimin ka lawm em em a ni.

"Club neitute bakah Sporting Director te leh Manager nen kan inbia a, kan inbiakna hian inrintawkna nasa tak min siamsak avangin contract thar hi ziah ngei turah ka ngai a ni," a ti.

Kum 2023-a Manchester City aṭanga pound maktaduai 42.5-a Blues pantu Palmer chuan, "Player-te nen pawh kan ti ti a, hmachhawp ropui tak kan nei vek a ni.

"He hmunah hian nomawi kan chawi zel ang tih ka ring a, chutiang team-a tel ve zel a, thah thawh ve chu ka duh a ni," a ti a, London club-in hlawhtlinna ropui zawk an chan zel a beisei thu a sawi.

Palmer hian tun season-ah Blues tan inelna hrang hrangah match riat khelin goal li a khung tawh a, assist vawi thum a nei tel tawh bawk.

Chelsea hian nipui transfer-a player langsar an lakluh nual bakah, an player langsar neihsate contract thar an ziahpui nual.

Joao Pedro chuan August thla khan kum 2034 thleng Blues-a khel turin contract a lo ziak tawh a, Pedro Neto chuan thla hmasa khan kum ruk atan contract thar a ziak bawk.