Real chak zanah Vini Jr. an hnawt chhuak
Spanish club lian Real Madrid chuan Inrinni zan khan Villarreal an mikhual a, Yan Diomande goal hmangin hnehna an chang. Inkhel zawha sawi zui hlawh ber erawh Vinicius Junior-a red card hmuh a ni.
Inkhel chu
Real-in inkhel thunun thei chiah lo mah se goal-ah an hlauhawm a, Kylian Mbappe-a'n goal a khung nghal teuh hle. French forward hian goal ban a pet per a, hemi hnu lawk hian chiang zeta Pau Navarro-a bum hnuah a hun ṭha neih a khawhral.
First half-ah Ibrahima Konate leh Arda Guler ten an chance neih chu goal zawnah an pet thei lo a, goal hmaah an hriam tawk loh avangin 0-0 in chawlhlawk an hmang.
Second half-ah Real bawk an hlauhawm a, Vinicius Jr. leh Diomande ten Villarreal tlarhnung an rum ṭhaih lehnghal. Villarreal pawhin a khat tawkin chance nei ve mah se Thibaut Courtois tan hna hautak an siam thei lo.
Los Blancos-in minute 62-naah goal an khung ta nge nge a, Federico Valverde pass chu Diomande-a'n cool takin a khung. Ivory Coast rawlthar goal hi offside phar a nih avangin pawm lo zet mah se, VAR hmanga ennawn a nih hnuah sut leh a ni a, Real goal awmchhun a ni zui.
Red card
Minute riat hnu lawkah Real-in goal an khung belh a, a khungtu chu Vinicius Jr. a ni. Real-in an hmahruaina an belhchhah angah inngai mah se VAR hmanga ennawn a nih hnuah, Brazilian forward hian goal a khung hmain Nathan Saliba samah a pawh avangin referee-in a hnawt chhuak.
Red card a hmuh avangin Vini a lawm lo a, referee an khumin a pan hnai nasa hle a, a teammate ten an lo dang hlauh zawk. Kim loa an khelh hnuah Real an bet a, Villarreal-in chance duhawm tak nei mah se Courtois an paltlang thei lo, harsa takin an chak hram.
Mourinho a ngawi
Inkhelh banah Real manager Jose Mourinho-a'n inkhel chungchang a sawi duh lo a, Portuguese manager chuan, "Ka ṭawngchhuak a nih chuan kan match dawt leh Sevilla leh Barcelona kan hmachhawn hunah ka awm ve a thiang dawn lo," a ti a, red card chungchangah lungawi lohna a nei tih a lang.
He thu buatsaih lai thleng hian match engzat nge Vini an hrem dawn tih a la chiang lo a, October 26, Pathianni zana El Clasico an khelh huna tel ve thei lo dinhmunah a ding.
Hetihlai hian Barca pawhin an mikhual Getafe chu 3-0 in an hneh ve bawk a, Anthony Gordon, Gabriel Jesus leh Jules Kounde ten goal khat ṭheuh an khung.