Bayern-in hmahruaina hun ṭha bawhpelh

German champion Bayern Munich chuan hnehna an chan chuan hmahruaitu an ni thei tih hre mah se, Inrinni zan khan Augsburg lakah hnehna an chang thei lo a, 2-2 in an inhnehtawk.

Inkhelh ṭan aṭanga second 8.4-na lekah Manuel Neuer a chesual a, Augsburg tan German keeper tihsual nangchingtu Robin Fellhauer-a'n goal ruakah khungin Bundesliga chanchina goal rang ber a ni. Fellhauer hian second kuaa khungtu Karim Bellarabi leh Kevin Volland te a khum.

First half-ah chance hmuh tur a tam lo a, chawlhlawk hman hma hretin Harry Kane-a'n hnai tak aṭangin a siphurh sutna remchang a hlah a, English forward hian crossbar a pet per.

Kum 33 mi Kane-a'n goal khung lo mah se a ṭangkai a, minute 55-naah an siphurh sutna goal chu Ismael Saibari tan a siamsak. Mahse Bayern lawm chhung a rei lo a, minute kaw hnu lawkah Neuer-a nam chhuah ṭhat tawk loh vangin Rodrigo Ribeiro-a'n Augsburg hma a hruai nawnpui.

Minute 80-naah Bayern tan Nathaniel Brown-a'n an siphurh a sut nawn a, Kane-a siamsak bawk a ni. Serge Gnabry leh Michael Olise ten chakna goal khung theihna hun ṭha an bawhpelh avangin point khatah Bavarians an lungawi a ṭul.