KDB hoin Napoli an chak

Inrinni zan Serie A khelhah Napoli chuan 3-0 in Frosinone an hneh a, Kevin De Bruyne chuan goal hnih khungin a langsar hle, KDB bakah hian Noa Lang chuan goal khat a khung ve bawk.

Stadio Diego Armando Maradona-a inkhelah mualneitu team tan Rasmus Hojlund-a'n minute 27-naah ama penalty hlawhchhuah chu a hlah a, mahse Frosinone keeper Lorenzo Palmisani-a'n 'goal line' a rah loh avangin referee-in a pet nawntir.

Manchester United forward hluiin pet nawn tawh loin De Bruyne a rawn pen chhuak a, cool takin an hmahruaina goal a khung. Napoli an phur laklawh a, buai nuai nuai karah Lang-a'n pet goal-in an hmahruaina a belhchhah.

Mikhual team-in chance an nei ve meuh lo a, Napoli erawh an hlauhawm tluan. Hun tawp hma hretin De Bruyne-a'n Giovane cross chu an chak nemnghehna goal atan a khung.

Napoli hi an chak bakah an midfielder pawimawh Scott McTominay a lo kir leh avangin an lawm a zual ang. Scottish midfielder hian minute 61-naah David Neres thlakin, zai a tawh hnua a inkhelh lehna hmasa ber a ni.