Vawi hnih chak mamawh Aizawl FC

Star Cement MPL13-ah Aizawl FC-in League Winner ni turin vawi hnih chak an la mamawh a, vawiin tlai dar 3:00 hian Saikhamakawn FC an hmachhawn dawn. Coach R. Lalruatfela hote hian round tawp berah Kanan FC nen an inkhel dawn a, point ruk a hlawh chhuak thei a nih chuan a zawnin season thum chhung League Winner an ni ang.

Aizawl FC hian MPL match hmasa berah Saikhamakawn FC hi 5-0 in an sawp tawh a, SKK hi tla thei dinhmunah ding mah se tun hnaia an result thlirin an inti phur zo tawh lo niin a lang. Coach Lalrindika Hmar hote hian match hnuhnung berah Chanmari FC an hmachawn a, 7-1 ngawtin an chak lo. An inkhelh tawhna leh tun hnaia an khelh dan thlir chuan AFC hi chak ngei tura ngaih an ni.

Coach R-a hote hian goal 36 khung tawhin MPL13-ah goal an khung tam ber a, an striker chhuanvawr Zomuansanga'n goal 12 a khung tawh a, a thlawptu Laltlanzova'n goal kua khung tawh bawkin an pahnih khung belh khawm goal 21 hi SKK goal khung zat goal 16 aiin goal nga ngawtin a tam zawk. AFC hian tlarhmaah Vincent Lalduhawma (2), T. Malsawmzuala (2) leh Vanlalramnghaka (2) te an nei zui a, SKK tan point hlawh chhuak tur chuan bus park a ṭul ang.