MPL final tem lawkna?

Star Cement MPL13-ah semifinal khel tur a chiang tawh a, intum tur la chiang lo mah se Mizoram Police FC leh Dinthar FC te knockout stage-ah an inhmachhawn dawn a nih chuan final-ah chauh an inhmachhawn dawn tih a chiang tawh. Zanin dar 7:00 hian tualchhung football-a sulhnu nei ṭha club pahnih hi an inkhel dawn a, pathumna zawnna a nih theih bakah final tem lawkna a ni thei bawk.

MPL hmasa berah Dinthar FC an champion a, hemi ṭum hian Mizoram Police hi champion rinkai an ni thung. Tun ṭumah erawh Maimawms leh Police chungah Aizawl FC leh Chanmari FC te an awm a, chutihrualin eng result pawh a thleng thei thung.

MPL-ah hian pakhatna leh palina te semifinal-ah an inhmachhawn a, pahnihna leh pathumna ten final khel tur an zawng bawk. Aizawl FC player ṭhahem takin Indian Football League club Nagaland United an zawm dawn a, semifinal khelh hunah an ṭhat dan berin an inlan dawn em tih a chiang lo.

AFC hi pakhatna ni turin an dinhmun a ṭha a, hei vang hian Dinthar emaw Police emaw tan pathumna nih aiin palina nih a châkawm thei bawk. Chutihrualin semifinal-a team boruak ṭhat nan leh inrintawkna neih nan, a ṭha thei ang bera league round khar a ṭul avangin team pahnih hian chak ngei an tum ang.

Tun season-a an intum hmasak ṭumin Police hi 1-0 in an chak a, an khelh zui zel dan thlir pawhin Maimawms aiin Police hi an khel a nung zawk. Mahse, Dintharin technical diretor-a K. Malsawmkima an ruat hnuah hma an sawn a, Police hi an chung en bik lo tawp ang.