Atletico khelmualah Man United

Premier League-a che ṭha lo Manchester United-in zanin dar 12:30 hian Champions League-ah Atlético Madrid an hmachhawn dawn a, an inkhelhna tur hmun hi Riyadh Air Metropolitano a nih avangin Michael Carrick leh a hote tan hna a harsa dawn.

English club hian kar tawp khan player 10-a khel Tottenham Hotspur an hneh thei lo a, Premier League-ah match ruk khel tawhin point ruk chauh an la hmu. La Liga lamah Atletico hian match riatah point 19 hmuin pahnihna an ni thung a, an chungah Barcelona chauh an awm.

Man United hmachhawn turin Atletico Madrid an dam kim a, chutihrualin nipui bazara Real Madrid, Barcelona leh Arsenal te lak tum Julian Alvarez erawh transfer a hlawhtlin tak loh avangin tun dinhmunah rinrawl a la ni rih lo. Chutihrualin kartawpa Alaves 2-1 a an hneh ṭumin Alvarez hi bench aṭangin a raw lut a, United lakah bul ṭan lo pawh ni se second half-ah inlan ngei tura ngaih a ni.

Michael Carrick-a'n hliam vangin Benjamin Sesko, Patrick Dorgu leh Matthijs de Ligt te a la chhawr thei dawn lo a, Thawhṭanni lama training zawm lo Luke Shaw leh Kobbie Mainoo te dinhmun a chiang lo bawk. United inrintawkna petu tur erawh season ṭan hma friendly match a ni a, Carrick-a hote hian Atletico hi kumin August 1 khan Bryan Mbeumo goal hnih hmangin 2-1 in an hneh.