Zemabawk leh Khatla intawng leh dawn

Mizoram Basketball Association (MBBA) buatsaih Favang Tournament semifinal chu zaninah khelh ṭan a ni dawn a, Mizoram Super League season hnuhnung bera finalist Zemabawk Basketball Club leh Khatla TBL te dar 7:00-ah an inhmachhawn leh dawn avangin boruak a nung nghal ang.

MSL 11-a an champion zawh loh hnuah Zemabawk an ṭang thar a, an player thar Lalhnehpuia, Lalruatkima, leh Lalrinchhana ten tournament an khelh hmasak berah an che ṭha nghal

ZBBC hian league round-ah chak loh an nei lo a, an pool-ah hmahruaitu an ni. Hei bakah hian Chaltlang Basketball Club nen an inkhelh ṭumin point 107 zet an score a, tun inelnaah match khata point nei hnem ber an ni.

Chutihrualin TBL an duai bik lo a, league round-ah Zarkawt BCA hneh lo mah se an chesual nawn duh tawh lo. Pahnihna niin final-a an hneh tawh Zemabawk an hmachhawn leh dawn.

Zemabawk hian TBL hi inelna hrang hrangah an ngam lo hle a, Emanuel VL Awmpuia, Vanlalṭhazuala leh Lalliansanga te awmna club hi zaninah pawh ZBBC tan hneh an awlsam dawn lo.

Chutihrualin Zemabawk tan Lalropuia leh K. Lalthianghlima te an khel chhe ngai meuh lo a, Rinchhana leh Ruatkima ten insiamrem an mamawh loh bawk avangin TBL hneh thei tura an ṭhat ber ṭumah a chhal ngam.

Tlai 5:00-ah D League club-in semifinal an khel hmasa dawn a, pool B hmahruaitu Chawnpui Basketball Club leh pool A pahnihna College Veng ten final luh an inchuh dawn.

College Veng hian an pool-ah Chhinga Veng hneh lo mah se semifinal lut turin an ṭha tawk tih an tilang a, hei bakah hian 'home advantage' an nei thei dawn.

Hetihlai hian Chawnpui hi pool A-ah hmahruaitu an ni a, MSL-a tawnhriat ngah RVL Lalhriatrenga leh Lallianmawia te an neih leh tawh avangin D League-a champion rinkai zinga mi an ni.

Inelna hi Hawla Indoor Stadium, Republic Vengthlangah khelh a ni a, a hmunah a thlawna a en theih bakah MBBA YouTube channel-ah a en theih bawk.