India tleirawlten Asian Cup khel dawn

AFC U17 Women’s Asian Cup China 2027 khel turin India hmeichhe Under-17 team te chu an tling a, qualifier-a an match hnuhnung berah Malaysia chu 4-0 ngawtin an sawp - India tan hian Redima Devi Chingkhamayum, Pritika Barman, Anushka Kumari leh Nidhi ten goal khat ṭheuh an khung a, Malaysia-in a chhanletna tur an nei lo.

Asian Cup qualifier-ah hian India hi group E-ah awmin, qualifier inelna thlengtu Malaysia bakah Syria leh Iraq te nen group khatah an awm ho - group tin aṭangin pakhatna chauh tlang tur an ni a, India hian hnehna chang vekin an tlang chiang hle!

Indian tleirawlte hian match hmasa berah Iraq chu 14-0 tehmeuhin an sawp a, match hnihnaah Syria chu 2-0 in an hneh zui - a tawpah anmahni ang thoa match hnih a zawna chak tawh Malaysia nen MP Selayang Stadium, Selayang-ah an inkhel a, 4-0 in a thlengtu meuh pawh an dim lo.

Joakim Alexandersson enkawl Indian tleirawlte tan AFC U17 a zawna an khelhna tur a ni a, Asian Cup-ah eng level-ah pawh India hmeichhiate a zawna an tlin hmasak ber a ni - Asian Cup U17 2026-ah khan India tleirawlte hian quarterfinal an lut a, tunah chuan a aia sang zawk an beisei leh ang.