Betis tan Isco a la tar lo

Pathianni zan La Liga khelhah Isco chuan goal hnih khungin a team hnehna a chanpui a, an mikhual Osasuna chu 5-2 an hnehin table-ah pathumnaah an awm a, Real Madrid aiin point khatin an sang zawk.

Estadio de La Cartuja-a inkhelah Real midfielder hlui Isco hian minute 10-na lekah penalty aṭangin an hmahruaina goal a khung a, minute 38-naah Abde Ezzalzouli-a'n khung ve bawk.

Second half ṭantirah Osasuna forward Ante Budimir-a'n an lamah a tauh lut palh a, hemi hnu hian Croatian forward hian an siphurh a sut ṭhen a, Raul Garcia-a'n a khung belh leh avangin mikhual team an phur thar.

Mahse Isco bawk a inlar a, Spanish midfielder hian buai nuai nuai karah a hmun dik takah awmin an goal lina a khung. Hun tawp hma hretin Jose Antonio-a'n an chak nemnghehna goal a khung.

Betis hian match riat an khelh tawhah chak loh leh inhnehtawk vawi khat ve ve an nei tawh a, vawi ruk chak tawhin hmahruaitu Barcelona leh Atletico Madrid te chiah an tluk lo.