Seedorf-a'n Corinthians enkawl dawn

Netherlands football legend Clarence Seedorf chuan Corinthians a enkawl dawn a, Brazilian club-ah hian kum 2027 thleng châm tura contract ziakin coach anga a club pangana tur chiah a ni.

Kum 50 mi Seedorf hian inkhelh a chawlhsan hnuah a club hlui AC Milan chu 2014 khan a enkawl nghal a, hemi hnu hian Chinese Super League club Shenzhen FC, Deportivo la Coruna leh Cameroon national team te a enkawl tawh bawk a, kum 2019 hnuah team enkawl a la nei leh lo.

Seedorf chuan, "He hna hi ka tan chuan chawimawina tluk a ni a, mawhphurhna sang tak a ni tel dawn bawk. Helai hmunah hian hnehna chang turin ka theihtawp ka chhuah dawn a ni," a ti.

Brazilian Serie A season kal mekah Corinthians hi 16-naah an awm a, relegation zone-a awm Internacional nen an point hmuh zat a inang. Corinthians-ah hian Manchester United player hlui Memphis Depay leh Jesse Lingard te an awm a, Seedorf-a hoin match riat khelh tur la awmah inham tan an tum dawn.

Real Madrid tan pawha khel tawh Seedorf hian 2012 leh 2014 inkar khan Brazilian club tho Botafogo tan a lo khel tawh a, player anga a club hnuhnung ber a ni nghe nghe. Kum hnih chhung Brazil-ah a lo inkhelh tawh avangin an ram chhung football a hrechiang dawn a, fans leh club hruaituten a lakah beisei an nei sang ang.