Verstappen-a'n a zia a chhuah

Pathianni zan Singapore Grand Prix neihah Max Verstappen chuan hnehna a chang a, tun season-a a vawi hnih chakna niin Red Bull driver hian a zia a chhuah leh ṭan.

Marina Bay Street Circuit-a intlansiakah a tir aṭangin Verstappen a langsar nghal a, Ferrari driver Charles Leclerc nen an inel nghal a, mahse Dutch driver hi a inthlahdah duh loh avangin a tawp thlengin hma a hruai a, pakhatna a ni.

Kum 28 mi Verstappen chuan, "Tun hnaia kan intlansiakah hian vanneihna kan lamah a ṭangin ka hria a, mahse kan thawhrim avangin kan vanneiah ka ngai. Ka thawhpuite an ṭha a, season tawp hmain thil ropui tak tak kan tih ho zel ka beisei," a ti.

Tun season-a chanchin ngah tak Verstappen hi podium vawi kua a lawnna chiah a ni bawk a, season tir lamah che ṭha tawk lo mah se a insiamṭha leh tawh. Driver's table-ah point 221 hmuin palinaah a chho a, hmahruaitu Andrea Kimi Antonelli chu point 119 chauhin a pha tawh lo.

Verstappen dawtah Leclerc chu pahnihnaah thlengin second sarihin Verstappen a pha lo a, Mercedes driver Kimi Antonelli chu pathumnaah thleng bawkin Italian driver leh Leclerc inthlauhna hi second 24 zet a ni thung.

Champion lai Lando Norris chu panganaah thlengin a teammate Oscar Piastri chu paruknaah a thleng bawk. McLaren driver pahnihte inthlauhna hi second kua chauh a ni.

Veteran driver Lewis Hamilton chu parukna a ni a, George Russell chu pakuana ni thei hramin point hnih chauh a hmu. Hetihlai hian Red Bull driver pakhat zawk Isack Hadjar chu 10-naah thlengin point khat chauh a hlawh chhuak bawk.

Singapore GP-ah hian driver panga an tlan tluan thei lo a, Alex Albon, Valtteri Bottas, Lance Stroll, Franco Colapinto leh Gabriel Bortoleto te chuan harsatna an tawh avangin a tawp an thleng ve thei lo.

Driver te hian kar khat chhung chawlh an nei dawn a, October 26 Pathianni zan hian United States GP an tlan leh dawn. Circuit of the Americas-a tlan tur niin Austin, Texas hmuna awm a ni.