Barca khingpui tur Galatasaray

Spanish champion Barcelona chuan zanin dar 12:30-ah Galatasaray an lenchilh dawn a, club pahnihte hi Turkish Super Lig leh La Liga hmahruaitu an nih ve ve avangin inkhel hmuhnawm a beisei ngam.

Barca hian tun season-a che ṭha tak Raphinha an chhawr thei dawn lo a, Brazilian forward hian a malpui a tihnat avangin Inrinni zana Getafe an hmachhawn ṭum pawh khan a inlan tawh lo.

Chutihrualin a hnampui Gabriel Jesus a awm tawh a, Arsenal forward hlui hian an match hnuhnung berah goal a khung avangin inrintawkna a ngah lai tak a ni.

Raphinha bakah hian Andreas Christensen leh Roony Bardghji te hliam vangin an khel thei dawn lo a, Frenkie de Jong dinhmun a chiang lo bawk. Mahse Catalan club hi an squad a chhah bakah tun season-ah chak loh an la neih loh avangin an hlauthawng dawn lo.

Hetihlai hian Galatasaray an duai bik lo a, Manchester City player hlui Leroy Sane leh Ilkay Gundogan neitu an ni. Tottenham Hotspur defender hlui Davinson Sanchez leh Arsenal midfielder hlui Lucas Torreira te bakah Rafael Leao an nei tawh bawk a, Hansi Flick-a naute tan chetsual theihna tur an ni.

Chutihrualin an striker chhuanvawr Victor Osimhen dinhmun a chiang lo a, damkawr a nih avangin Barca lakah a inlan a nih pawhin bul a ṭan a rinawm loh. Mahse Turkish club hi an muala hmachhawn châkawm loh an ni a, fans nen ṭangkawpin Barca an lo mikhual ang.