NorthEast United-in Mohun Bagan an hneh!

Indian Super League-ah beisei loh result kan hmu nghal - Thawhṭanni zan khan NorthEast United chuan 1-0 in Mohun Bagan an barakhaih a, Indian club hausa ber pawl Bagan-in tun season ISL-a an match hmasa berah an tlawm nghal.

Highlander tan Jithin MS chuan hun pek belhah goal a khung a, mikhual Mohun Bagan tan chhanletna hun a awm tawh lo - NorthEast United an chak a, Bagan an hneh miau avangin tun season atan beiseina sang tak an nei nghal ang.

Bagan tan player thar Lallianzuala Chhangte-in inkhel bul ṭan mah se, Lunglei tlangvalin danglamna a la thlen thei rih lo a, second half-ah Manvir Singh-a'n a thlak.

Mizo midfielder ṭha Lalengmawia Ralte (Apuia) pawhin Bagan tan inkhel bul a ṭan a, minute 90 khel tluan mah se, a team a chakpui thei ta bik lo - NorthEast United lamah hian Mizo player inlan an awm lo thung.

ISL hi nizanah inkhel a awm lo a, zanin dar 7:30-ah Punjab FC leh Odisha ten an khelh chhunzawm ang. Punjab club hian Mizo player kawl an nei lo a, Odisha-ah hian defender Vanlalzuidika Chhakchhuak, Jeremy Zohminghlua, midfielder pahnih, K. Lalṭhathanga leh K. Lalrinfela te an awm.