Vincent-a'n Aizawl FC a chakpui

Star Cement MPL13-ah nimin tlai khan Aizawl FC-in Vincent Lalduhawma goal hnih hmangin Saikhamakawn 2-0 in an hneh a, League Winner ni turin match tawp bera Kanan FC hneh chauh a ngai tawh. Coach R. Lalruatfela hote hian match 13 aṭangin point 32 an hmu a, Saikhamakawn erawhin point 10 chauh an la hmuh avangin tla thei dinhmunah an ding.

AFC-in captain Rohmingthanga hahdamna hun an pe a, Zomuansanga'n captain armband a hreng. Goal 12 khung tawhtu Khawbel tlangval Zomuana'n goal a khung lo a, goal kua khungtu Laltlanzova pawh scoresheet-ah a lang lo. Mahse, Vincent Lalduhawma a rawn inlar a, Baktawng/Tlangnuam tlangval hian first half-ah goal pawimawh khungin second half-ah cool takin goal hnihna a khung. Malsawmzuala Tlangte erawh goal hmaah a vannei lo thung.

Coach R-a hoten an phu ang ngeiin 2-0 in hnehna an chang a, match tawp berah Kanan FC an la hmachhawn dawn avangin fimkhur erawh a ṭul ang. MPL11 aṭangin League Winner tan nomawi siam a ni a, Aizawl FC hian ṭum hnih nomawi chawi tawhin kuminah a lungthu kim nan League Winner nih leh ngei an tum dawn a ni.