Zarkawt hmaa ding tur Chanmari

Mizoram Basketball Associa-tion buatsaih Favang Tournament semifinal zan hnihna chu zaninah chhunzawm a ni dawn a, dar 7:00-ah Mizoram Super League-a champion ngun ber Zarkawt BCA chuan Chanmari Basketball Club an hmachhawn dawn.

BCA nge nge

MSL 11-ah BCA hian Zemabawk hneh zo loin semifinal-ah an tla a, tournament an khelh leh hmasak berah an thinrim hrikthlak nan champion ngei an duh dawn a, an coach Lalhruaitluanga hoin thapui an thawh ang.

BCA hian Michael Liansanga an neih belh a, Matthew Remtluanga Sailo an neih sa bawk avangin defence lamah an khawng ṭha a, Big Mike-a'n a club hlui Chanmari lakah tlawm a duh dawn lo bawk.

Zarkawt club hian an point guard pawimawh Zonunsanga an la chhawr lo a, league round hnuhnung bera Ramthar Vanguard nen an inkhelh ṭum pawhin Zonuna a inlan lo.

Chutihrualin BCA hian Lalhmachhuana leh Lalhmingsanga te an nei a, player pahnihte hian MSL-ah rintlak an nihzia an pholang tawh. Hei bakah hian Vanlalchhuanawma an kawl bawk avangin final luh an beiseina a sang dawn.

Hello Chanmari

Tun inelnaah Chanmari an che chhe lo a, Zemabawk BC chiah hneh loh an neiin Pool B-ah pahnihna an ni a, champion thei zinga mi an ni tih lantirin semifinal an lut.

Chanmari tan Lalrozama a pawimawh a, Kanan Veng tlangval Rozama hi player dang angin sang lo mah se a che rang a, a ball ken a ngheh bawk avangin an khingpuite tan dan a harsa ṭhin.

A unaupa Lalnunpuia sawi hmaih a thiang lo bawk a, Nuna hi Chanmari tan player pawimawh a ni a, zaninah BCA laka an innghahna pakhat a ni leh ang. Hei bakah hian Malsawmtluanga leh Lalfakmawia te an nei bawk a, rinkai zawk ni lo mah se inbarakhaihna thlentir turin an ṭha tawk.

D League

Tlai dar 5:00-ah D League club te an inkhel ve thung dawn a, champion tura rinkai ve ve Chhinga Veng Basketball Club leh Ramhlun Sporting club ten final luh an inchuh dawn.

Chhinga Veng hi pool A-ah hmahruaitu an niin chak loh an la nei lo a, phu takin semifinal an lut. Hetihlai hian Ramhlun SC erawh pool B-a pakhatna Chawnpui BC aiin point score leh hloh lamah an record ṭha mah se 'head to head' en a nih avangin pahnihna an ni.

MSL aṭanga relegate hlim ni mah se Chhinga Veng hian Khatla TBL tan pawha khel tawh Johan Lalthianghlima an nei a, tawnhriat nei ṭha Lalruatkima Sailo la lut bawkin, Easter Malsawmtluanga an la neih bawk avangin final lut turin beiseina sang tak an nei a ni.

Hetihlai hian Ramhlun an duai bik lo a, season hmasa Division 1 champion team hian veteran player Michael F. Lalawmpuia an nei a, MSL lo khel tawh Lawmsangzuala (SP-a) leh Jesai Malsawmtluanga te an neih bawk avangin champion turin an ṭha tawk.