US GP-ah Antonelli champion dawn em?

Andrea Kimi Antonelli chu Singapore Grand Prix neih zawh takah pathumna ni mah se, October 26, Pathianni zana United States GP neih turah champion theih dan a nei a, mipui mit fukna a ni ang.

Beisei phak bakin tun season-ah Antonelli a che ṭha a, March thlaa Japanese GP aṭang khan driver's table-ah hmahruaitu a la ni char char. A teammate George Russell nen Mercedes chu constructor's table-a pakhatna an nih theih nan an thawh hlawk hle.

Kum 20 mi Antonelli hian tun season-ah record tam tak a lo siam tawh a, a champion a nih ngat chuan Sebastian Vettel-a'n kum 23 mi a nih laia champion thei naupang ber record a lo siam tawh chu a khum dawn a, Antonelli tan record ropui ber a ni thei hial ang.

Italian driver hian point 340 hmuin hmahruaitu a ni mek a, vawi riat zet a chak tawh bakah podium vawi 14 a lawn tawh. Amah hnaih bertu a teammate Russell nen point 102 in an inthlau.

Tun season atan intlansiak paruk chauh a awm tawh dawn a, point 150 hlawh chhuah theih a la awm. Circuit of the Americas-ah Antonelli hi a chak a nih chuan point 25 a hmu thei dawn a, amah hnaih bertu Russell-a'n point hnih ai tam a hmuh loh bakah, Ferrari driver Lewis Hamilton-a'n point 10 ai tam a hmuh loh a ngai.

Antonelli hi a champion a nih chuan 1953 hnua Italian driver champion leh hmasa ber a ni thei dawn a, Italian zinga champion thei pathumna a ni chiah ang.

Chutihrualin tun hnaiah Max Verstappen a che ṭha thar a, Antonelli tan hnehna chan a awlsam tawh dawn lo. Hei bakah hian Charles Leclerc leh champion lai Lando Norris te an la awm bawk a, Antonelli tan a awlsam dawn lo.