Intum tawk tur Villa leh Fenerbahce

Champions League-ah zanin dar 12:30 hian Premier League club Aston Villa chuan Turkish club ṭha Fenerbahce an mikhual dawn a, team pahnihte hi an player neih dan ena intumtawk tak tur an nih avangin inkhel hmuhnawm a beisei ngam.

Unai Emery-a enkawl Villa hian UCL an khelh hnuhnung ber khan quarterfinal an thleng phâk a, an hneh loh chu champion zui ta Paris St-Germain a ni. Tun season-ah erawh a player an neih ṭhat avangin a aia sang thlen an tum ngam ang.

Villa hi nipui bazarah an che na a, Johan Manzambi, Nicolas Jackson, Ibrahim Mbaye, Joao Gomes, Zion Suzuki, Taylor Harwood Bellis, Matteo Ruggeri leh Madou Keba Cisse te lak luh nan pound maktaduai 257.48 an hmang tling.

Zaninah erawh hliam vangin Amadou Onana, Ian Maatsen, Leon Goretzka, Cisse leh Brian Madjo te an khel thei dawn lo a, mahse an squad a chhah ṭhat avangin Emery-a'n lungngaihna tur a nei lo.

Hei bakah hian season hmasa Europa League-ah khan round of 16-ah Jadon Sancho goal hmangin an lo pet chhuak tawh a, hei hian inrintawkna tam tak a pe tel ang.

Hetihlai hian Fenerbahce-in player langsar an ngah ve tho a, Premier League pawh lo khel tawh Ederson Moraes, Nelson Semedo, Nathan Ake, N'Golo Kante, Matteo Guendouzi leh Villa tan pawha khel tawh Marco Asensio te an nei a ni.

An innghahna tur ber erawh an tlarhma a ni a, Manchester United forward hlui Mason Greenwood leh Romelu Lukaku bakah season hmasa La Liga-a goal 23 khungtu Vedat Muriqi a la awm cheu.

Turkish club hian an player pawimawh zingah hliam nei an awm lo a, an ṭhat dan bera an inlan theih dawn avangin Villa Park-ah hnehna chan tumin an leng lut dawn.