Raynaud hliam endik leh dawn

NBA season thar atana inbuatsaihnaah Sacramento Kings leh Golden State Warriors inkhelah player Maxime Raynaud chuan a khup a tina a, Raynaud hliam hi endik leh tur niin Kings hi 111-106 in an chak lo zui.

Chase Center, San Francisco-a inkhelah Raynaud hian Stephen Curry dan a tumna lamah a ke a nghat dik tawh lo a, a khup ding lam tinain a tlu a, wheelchair hmanga nawr chhuah a ngai hial.

Kings coach Doug Christie chuan, "Infiamnaah hian ka hun tam zawk ka hmang tawh a, inhliam hi thil pawi tak ni mah se a ken tel pakhat a ni. Raynaud inhliam hi pawi kan ti takzet a, chutihrualin a tan kan awm reng a, a ṭhat leh vat kan beisei," a ti.

French center hliam hi MRI exam neih a nih hnuah kar hnih hnua endik leh tura tih a ni a, a nat dan tak hriat chian theih a la ni lo. October 22, Ningani zing hian Kings hian season thar atana an match hmasa ber ni turin Los Angeles Clippers an hmachhawn dawn a, Raynaud a tel theih a rinawm loh.

Kum 23 mi Raynaud hi nikum NBA draft-ah khan Kings hian an club-a khel turin an sawm a, match 74 khelin vawi 56 lai bul a ṭan. Match tinah point 12.5 leh rebound 7.5 nei ziah ang a ni a, ft 7 leh 1in zeta sang niin Kings player pawimawh a ni nghal

Western Conference club hian center-a khel thei turin Dylan Cardwell an nei a, Precious Achiuwa leh Domantas Sabonis te chu center anga chhawr theih an nih bawk avangin rilru hahna tur erawh a awm lo.

Kings hian tun nipuiah Darius Acuff Jr., Daeqwon Plowden, Alex Karaban, Emanuel Sharp, Adam Flagler, Jonathan Mogbo te an la lut tawh a, Rookie of the Year pawh lo dawng tawh Ben Simmons chu kum khat zet a inkhelh tawh loh hnuah an lak luh avangin thawn an nei lian a, table mawng lama hun hman an tum tawh lo ang.